බලන්ගොඩ නගරය ආශ්‍රිතව ඇති දොරවෙල ඔය ප්‍රදේශයේදී ඉකුත් 27වනදා 78 හැවිරිදි විවාහක කාන්තාවක දුෂණය කර අභිරහස් ලෙස ඝාතනය කිරීමේ සිද්ධියක් සම්බන්ධයෙන් 17 හැවිරිදි පාසල් සිසුවෙකු සැකපිට අත්අඩංගුවට ගෙන තිබේ.
සැකකාර සිසුවාව බලන්ගොඩ වැඩබලන මහෙස්ත්‍රාත් ඩී. එමී. චන්ද්‍රසේකර මහතා හමුවට ඉදිරිපත් කිරීමෙන් පසු ලබන 08වනදා දක්වා රක්ෂිත බන්ධනාගාරගත කර ඇත.
සැකකරු සම්බන්ධයෙන් කායික, මානසික සහ සමාජ රෝග පිළිබඳව වාර්තාවක් කැඳවන ලෙසත් සැකකරු DNA පරීක්ෂණකට යොමු කරන ලෙසත් නියෝග කර තිබේ.
බලන්ගොඩ මුගුණමලේ ප්‍රදේශයේ පදිංචිව සිටි එමී.එල්. සිරියාවති නැමති කාන්තාව ඉකුත් 27 වනදා දිය නැමට දොරවෙල ඔයට ගොස් ඇති අතර පසුව ඇයගේ සිරුර දොරවෙල ඔයේ තිබී සොයා ගැනුණි.
බලන්ගොඩ මූලික රෝහලේදී සිදු කළ මරණ පරීක්ෂණයේදී මතුවූ සැකය මත සිද්ධිය සම්බන්ධයෙන් විමර්ශන සිදුකර තිබුණි.
පශ්චාත් මරණ පරීක්ෂණයෙන් තහවුරු වී ඇත්තේ මෙම කාන්තාව අවස්ථා කිහිපයකදීම ලිංගික අපයෝජනයට ලක් කර ගෙල සහ මුඛය සිර කර ඝාතනය සිදුකර ඇති බවටය.
සිද්ධිය සම්බන්ධයෙන් වැඩිදුර විමර්ශන බලන්ගොඩ පොලීසිය සිදුකරයි.
සිද්ධියට මුහුණ දුන් කාන්තාවගේ පුත්‍රයා සඳහන් කළේ, "අම්මා නානවා දැකලා තමයි මෙතනට ඇවිත් තියෙන්නේ. අම්මා දත් දාලා හිටියේ. කට තද කරලා අල්ලගත්ත වෙලාවේ දත් උගුරේ සිර වෙලා."
